Hakha Sangthar samh mi hmun a tingco mi zatceo hrawng, minung 135 lawng nih tangka an thawh rih, tiah tuanvo ngeitu sin in July 16 ah kan theih.
“Min cazin tling ngaingai ka sin a phan rih lo nain minung 135 hrawng nih an thawh cang. Tangka fang in sing 3100 hrawng a si. Hmun kan samh mi zong a taang rih mi 155 hrawng a si i tinco awk ah aa tlak ko nain a tingco rih lo mi kha kan hlat lio hna. Tingco loin um hrimhirm hna hlah seh, tingco dih hna seh, ti hi kan saduhthah a si. Cun, ka hmun a chia tuk, tiin a rak chim mi kha committee nih zeitindik an ruahpiak te ko hna lai. Cu lam tu cu committee nawl a si, ka hngal dih kho lo,” tiah Chin Ramkulh Cozah Lamsuul Minister Pu Sui Thio nih The Hakha Post ah a chim.
Hi kong ah Hakha Peng Sipin Committee Chairman Pu Ngun Vung nih, “Hi inn hmun man hi voi thum ah pek ding in kan thenpiak hna. July 15 ah voi khat, July thla dih ah voi 1 le August 15 khi a dihlak in an cham dih lai. Cu lo ahcun, hi lam le hmun, ti le mei tiang tangka sing thongthong leiba in kan tuah mi a si ca ah, August 15 hlan hrimhrim ah an thawh dih lai,” tiah The Hakha Post ah a chim.
Hi Sangthar acre 600 hrawng chung ah acre 300 hrawng lawng samh rih a si i, a taang mi hi August thla chung thiamthiam ah an samh rih lai, tiah kan theih
