Hakha Sangthar samh mi cu August 15 khi a hnu bik tangka thawh ding a si i a tho lo mi cu chuh an si lai, cucu phung (upadi) kan ser mi a si, tiah Hakha Peng Sipin Committee Chairman Pu Ngun Vung nih July 23 ah a chim.
“Phung kan ngei. Awngbali an zuh ni in tangka thawh a si. July 15 hi a voi khatnak, July thla dih hi a voi 2nak le August 15 khi a hnu bik tiin kan tuahpiak hna. A ruang cu voi khat ah a dihlak in an thawh khawh lai lo ca ah a nicaan kan thawnpiak mi hna a si. Asinain, August 15 tiang i a tho lo mi le pehtlaihnak zong a tuah lo mi cu, ka hmun ka duh lo, a ti mi an si lai, tiah phung kan ser mi a um i chuh than an si ko lai,” tiah Pu Ngun Vung nih The Hakha Post ah a chim.
Hakha Sangthar samh mi hi nihin tiang ah 4.09 billion dih in a baa in an tuah cuahmah. A dihlak dih ding ah an suaisam mi hi 5.5 billion a si lai. Lam cawhnak, phahnak, lutihor tuahnak, ti le mei tibantuk in a herh mi hna kha a baa in tuah mi an si ca ah August 15 tiang tangka a tho lo mi cu chuh than an si ko lai, tiah kan theih.
