Hakha Sangthar samh cuahmah mi hmun ah, “Keimah hmun a si,” tiin a chim i hmun a tingco mi he ruahthiamlonak tiang a um ca ah direct bak in dan kan tatcolh hna lai, tiah Chin Ramkulh Cozah Lamsuul Minister Pu Sui Thio nih July 16 ah a chim.
“Awngbali zuh in kan hun phawtzamh cuahmah lio ah, hika hi cu keimah hmun a si, tiin a chim mi an um. Upadi Lutlai Pu Sonny Thang Cung, Sipin le Electric Minister Pu Soe Htet le tiin atu hi kan timhtuah lio a si. Upadi ning tein dan kan tatcolh hna lai,” tiah Minister Pu Sui Thio nih The Hakha Post ah a chim.
Hakha ah Sangthar samh mi hi acre 600 renglo a si i atu a voi khatnak acre 300 hrawng an samh cang. A voi hnihnak samh ding zong atu hi an tah cuahmah. A voi khatnak phawtzamh mi hmun an zohfel cio hna lio ah, “Keimah hmun a si,” tiin a chim mi an um ca ah Chin Ramkulh Cozah tuanvo ngeitu nih biatak tein tuanvo lak an timh, tiah kan theih.
