2021-2025 karlak Chin Ramkulh chung khuatekomh le sangkip khuabawi hna cu 2021 March thla chung ah thimnak an tuah lai tiah theih a si.
Chin Ramkulh chung khuatekomh le sang khuabawi hna thimnak hi a voi tumnak an remh mi upadi pohma 8 ah, “Sang a si lo ah khuatekomh khuabawi hna i an tuan caan cu President nih a tuan caan bantuk in a si lai,” tiah aa tel.
Hi kong he pehtlai in Penguk Zung rian ngei pakhat nih, “Atu sang le khuatekomh khuabawi an dihlak an tuan caan hi 2021 March 31 ah a dih lai. Cu a si ca ah sang le khuatekomh khuabawi thar thim khawh nakding ca ah January zarh donghnak lei in timhlamh a si lai. Cun, 2021-2025 kum kar i a tuan hnga ding pawl hi 2021 February zarh hnihnak in 2021 March zarh thumnak kar ah thim dih an si lai i, 2021 April 1 in a thar nih an tlaih cang lai,” tiah The Hakha Post ah a chim.
Sang le khuatekomh khuabawi hna thim tik ah upadi pohma 5 chung i aa tel ning ah, “Myanmar ram mi nulepa nih hrinmi a si lai. Kum 25 a tling mi a si lai. Sang asiloah khua ah kum nga chung a ummi a si lai. Cozah pension a si ahcun sang chung ah kum hnih chung a ummi a si zong ah ruahpiak khawh a si. Mizapi nih bochan mi le tlaihchan mi a si lai. Khuabawi a tuan lio ah Cozah riantuan si hlah seh. Cun, hriamtlai phu pakhat khat ah chungtel si lo ding, phungning loin dirh mi zatlang phu ah aa tel lomi. Amah he hmunkhat ah a ummi a chungkhar hna zong an dihlak in an nun a fel lai an dingfel lai,” tiah aa tel.
