Myanmar ralkap le AA hriamtlai kahdohnak ruang ah Sami khua ah aa dor mi Paletwa ralzaam hna ngandamnak lei kong ah thinphang le lungrethei in an um, tiah March 26 ah kan theih.
Hi kong he pehtlai in People Hope Organization Director le ralzaam zohkhenhnak ah tuanvo ngeitu U Jolly Aung nih, “Atu lio cu kan theih cio bantuk in, COVID-19 zawtnak cu Chin Ramkulh chung zong ah hmuh a si cang ca ah, hika ah a um mi ralzaam hna ngandamnak lei kongkau zong ah thinphang le lungrethei in kan um. Atu hrawng cu ngakchia zong an chung a tlik hna, an luak tibantuk in an um i, an ngandamnak lei ah tha tein zohkhenh an herh. Singapore le ramdang hna in a rak phan ding an um i, COVID-19 he pehtlai in lunghrinh mi hna an um tiah an chim mi kan theih fawn i kan thinphang ngai. Cun, minung zong hi hmun khat ah minung 500/600 hrawng in chiah an si. Ralzaam dihlak ah minung 3,200 hrawng an si cang,” tiah The Hakha Post ah a chim.
“Sami ah aa dor mi ralzaam hna hi kanmah Cozah sin a phan mi cazin ning in cun minung 2,700 hrawng lawng an si. Atu lio zawtnak COVID-19 he pehtlai in an thutdir ning zong hmun tampi ah kan then hna i, hmun khat ah minung 300 hrawng in kan chiah hna. Cun, siibawi te zong kan thlah ko hna. Ralzaam hna ca ah umnak inn fa tete bawmhnak a rak tlung ding mi a um i, a phanh in cun inn dang tein kan chiah ko hna lai,” tiah Chin Ramkulh Cozah chimphuannak nawlngeitu Sipin Minister Pu Soe Htet nih March 25 ah The Hakha Post ah a chim.
Cun, U Jolly Aung nih, “Ralzaam hna ca ah, bawmhnak an pek mi tete zong a phan ngai cang. Japan khuasa Hakha a tam deuh an umnak Khrihfabu Tokyo Chin Church nih ralzaam hna, belkheng, kawzaw, bawngbi chungnawh le bawli tibantuk cawknak ca ah tangka sing 50 kanmah sin ah an kan kuat,” tiah The Hakha Post ah a chimchap.
Hakha khuapi zong ah Paletwa ralzaam ca ah Hakha Youth for Paletwa IDPs tiah an dirh i, an cawlcang cuahmah, tiah kan theih.
