Sami ah aa dor mi hna ralzaam chung in siangakchia hna sianginn kai nakding ah sianginn sakpiak ding an ti mi cu, an sak khawh rih lo ca ah lungrethei in an um, tiah kan theih.
Hi kong he pehtlai People Hope Organization Director le Paletwa ralzaam tawlrelnak kong ah a cawlcang mi Pu Jolly Aung nih, “Atulio Sami ah aa dor mi ralzaam ca ah a har bik mi cu, siangakchia ca ah a si. Ralzaam chung in siangakchia minung 1000 hrawng an um i, sianginn a va kai ding ah aa hlat tuk. Sianginn thar sakpiak ding an ti mi zong an dih kho rih lo. COVID-19 lio zong a si fawn i, an sianginn kai nakding kong ah lungrethei a si ko,” tiah The Hakha Post ah a chim.
COVID-19 zawtnak kong he pehtlai in Quarantine centre ca ah tiah Ramkomh Cozah nih inn sakpiak ding in a timh. Cu inn cu, sianginn ah hman beh ding in timhlamh a si nain, atu tiang sak hram an thok rih lo, tiah kan theih.
“Hi sak ding mi hi, Sami ah inn 2, Paletwa ah inn 2, Seinsinwa ah inn 1, Miza ah inn 1 tiah sak ding in timhlamh a si,” tiah Minister Pu Soe Htet nih a rak chim bal.
Siangsangrun cu sianginn hon a si cang bantuk in, ralzaam chung siangsangrun siangakchia hna zong Sami No.1 sianginn an kai, tiah kan theih.
Photo/ The Hakha Post
