Salai Lungthli Tum nih Thantlang Peng le Hakha Peng khuate lei miharsa bawmhnak pek cu a thok cang i, khua 6 a pek cang hna, tiah kan theih.
“Miharsa bawmhnak cu ka naule nih July 8 in pek an thok cang hna. Hniarlawn, Naabual, Phai, Hranhring, Hairawn le Tiphul a dihlak ah khua 6 hi July 8 ah an kal khawhnak khua an si. Ks.20,000 cio chungkhar 18 kan pek hna i Ks.360,000 a dih. Fur lio a si ca ah khuate kal hi a har pah, khuate vialte kal dih cu thla khat deng kan rau te lai,” tiah a chim.
Atu bantuk in bawmhnak a pek mi hi party lemsawinak a si tiah mi cheukhat nih an ti mi kong ah Salai Lungthli Tum nih, “Tutan bawmhnak kan pek hi politics he aa pehtlaih bak lo, NLD ca ah campaign tuahpiak zong a si hrimhrim lo. A harsa deuh mi zawnruahnak lungthin thiang in bawmh mi a si. A ka dohtu cheukhat nih phundang deuh in nan mer mi ka hmuh ah khin ka lung tha lo ngaingai. Kaa ralrin ve ca ah khuate ka kalter mi hna hi ka naule lak ah Chin party a tanh mi pahnih an si. An kalnak ah party le politics kong pakhat hmanh chimrel lo ding bia ka cah hna,” tiah fianternak a tuah.
Hi bawmhnak hi sing 100 hrawng dih in Hakha le Thantlang Peng khuate 153 chung ah khate ah miharsa dawng thum cio Ks.20,000 bawmh an si lai. A bik in ramtha ah chungkhar a um ve lo mi, nuhmei, tar le pumtlinlo papek an si lai, tiah The Hakha Post ah a chimchap.
