January 24 ah Saiha le Lawngtlai karlak ah a cang mi mithahnak kong he pehtlai in sualnak a ngei lo mi Lawngtlai District chung ralzaam hna nih harnak an ton nakhnga lo Lairam Isua Krista Baptist Kohhran (LIKBK) nih mizapi sin ah forhfialnak le theihternak ca a chuah.
Chin ramkulh in Mizoram ah a rak ra mi minung pali nih Saiha Auto Rickhow mongtu an thah ruang ah Saiha zatlang ah Myanmar ralzaam pawl cung ah lungfahnak a um bang in Lawngtlai zong ah online in Myanmar ralzaam pawl mawhphurhnak tete a um pah ve.
Cucaah, Lawngtlai District chung ah aa dor mi sualnak ngei lo Myanmar ralzam (Chinmi) hna nih harsatnak an ton nakhnga lo LIKBK Assembly nih mizapi sin ah forhfialnak le theihternak a tuah hi a si.
“Ralzaam zohkhenh kong he pehtlai in LIKBK nih nihin ni tiang ṭuanhma kan laak peng ko. Unau thisen khat kan si bang in aa dang mi ram ah um hmanh usilaw, ramri nih an kan ṭhen kho taktak lo. Khrihfabu nih nihin tiang an harsatnak hngal in kan ti khawh tawk in dawtnak le zawnruahnak he kan zohkhenh hna. Nizaan tihni ah a cang mi thahnawnnak kong he pehtlai in sualnak a ngei lo mi ralzaam hna cung ah sual puhnak le huatnak faak pi in a um tiah kan theih. Hi kong ah hin Khrihfabu hna i fimkaan kan hau ngaingai. Biadik theih hmasa lo in, huatnak le ralser duhnak lungput he chimrel hi a um tawn. Cucaah, kan i fimkaan a herh ngaingai. Ralzaam kan unau hna hi a herh ning in kan huhphenh hna a herh. ‘Kan u le kan nau, zumtu hawi an si’ ti in kan sin ah aa rak dor mi an si,” tiah LIKBK Assembly nih cathanh a chuah.
“Hi bantuk thil poipang a chuah caan ah hin Refugee Ministry dohkalh in chimrel a tam ngai tawn. Cucaah, Khrihfabu hna zong nih thil sining i fian hi abiapi ngai…miza kip cawh an si caah an lak ah chimh har deuh le zukhmawm tawngtham zong an um kho ko. Phung a buar mi hna cu phungning in dantat le thil ṭha lo tuah an ngol nakhnga nawlngeitu kan bawmh hna zong a herh. Pathian nih Israel miphun sin ah ‘Cucahcun ramdangmi cu daw hna u, nannih zong Aigupta ram ah khan ramdangmi nan rak si kha’ a ti kha hngal peng ko uh,” tiah LIKBK Assembly nih Khrihfabu le mizapi sin ah theihternak a tuah.
LIKBK hi Lawngtlai District chung ah a ngan bik mi biaknak lei phu a si i, ralzaam zohkhenhnak kong he pehtlai in Refugee Ministry ti mi zong a ser.
Lawngtlai District chung ah a um mi ralzaam hna thinlung, thlarau le taksa lei in hnangam te in khua an sak khawh nakhnga Refugee Minsitry nih ṭuanhma a laak pin ah ralzaam hna he pehtlainak a ṭhat nakhnga Refugee Coordinator zong an chiah, tiah kan theih.
