Sagaing Ramthen, Kalay Peng ah Pyithu Hluttaw, Amyotha Hluttaw, Ramthen Hluttaw No.1 le No.2, Chin le Shan miphun hna Hluttaw pawl ah a dihlak in NLD nih teinak a hmuh tiah theih a si.
Pyithu Hluttaw ah NLD nih mee 13,0000 leeng in hmai a hruai i a pahnihnak ah USDP nih mee 30,000 an si. Amyotha Hluttaw ah NLD nih mee 130,000 leeng le USDP in mee 32,000 leeng in a pahnihnak a si ve tiah kan theih.
Cun, Chin Affairs Minister Hluttaw mee hmun ah NLD nih 38,000 leeng in a pakhatnak a hmuh i, mee 11,000 leeng in Independent in aa zuam mi Pu Bun Za Nan nih a pahnihnak a hmuh.
Sagaing Ramthen thimnak kong he pehtlai in Chin Affairs Minister ca ah Independent in aa zuam mi Salai Lal Than Cuang nih, “Sagaing Ramthen chung hi a dihlak in NLD nih teinak a co. Kei hi Chin Affairs Minister Hluttaw hmun ah aa zuam ve mi ka si i, keimah le ka phuttawk mee cu ka hmuh ve ko. NLD hi cu thimnak hlan in an thawng lai ti cu mizapi nih zumh le theih dih cio a si. Asinain, atu Affairs Minister hmun tu hi cu Cozah an ser khawh nakding ah aa pehtlai lo i mizapi sin ah chimfiannak zong ka tuah. Thimnak tuah mi zong hi a tlamtling tuk ko, teinak a hmu mi NLD in Pi Lalrinmuan a si i, amah zong nih tampi rian an kan tuanpiak ko lai,” tiah The Hakha Post ah a chim.
Shan Affairs Minister mee hmun ah NLD in mee dihlak tluk in a laak i, USDP nih mee 19 lawng a hmuh tiah theih a si.
