2020 kum Myanmar ram party tling Democracy thimnak ah Sagaing Ramthen CNLD party in Chin Affairs Minister aa zuam ding Pu San Thawm Thang cu Sagaing Ramthen, CAM ah Independent in aa zuam ve ding Salai Lal Than Cuang nih Commission zung ah report a tuah tiah thawng kan theih.
Hi kong he pehtlai in Salai Lal Than Cuang nih, “Atu bantuk in report ka tuah hi, biaceih zung le, Palek sin ah a si lo. Report ka tuah ti zong ah report theng khi si lo. Meepek sawmnak a kalnak poh ah Lal Than Cuang cu a kum tling loin aa zuam mi a si i, mee nan thlak zong ah zeihmanh a tuah kho ding khi a si lo tiah a ka ti. Cun, atu report ka tuah ti mi zong hi Commission zung tang ah a ummi remternak committee sin ah ka chim mi a si. Committee lei zong nih dantat ding le tazacuai ding pakhat hmanh a um lo. Hihi kanmah pahnih kar i hmuh thiam lonak a si ca ah Committee lei nih remnak kan serpiak hna seh ti ka duh i atu bantuk in ka chimh hna hi a si. Atu bantuk in bia a chim ca ah keimah sin ah mee thla ding in aa fiang mi zong aa let than mi an thahnem ngai i keimah ca ahcun sunghzatlak bantuk a si ko,” tiah The Hakha Post ah a chim.
Salai Lal Than Cuang hi 2020 kum Myanmar ram party tling democracy thimnak ah Sagaing Ramthen, Chin Affairs Minister in aa zuam ding a si.
Cun, Pu San Thawm Thang nih, “Salai Lal Than Cuang nih, ka min in meepek sawmnak a tuah i, anih cu kum 35 a tlin lo ca ah mee nan pek zong ah mee nan pekmi zeihmanh san a tlai lo tiah a ti timi hi bia dik lo a si. Meepek sawmnak kan kal i, mizapi sin in biahal ka ton mi chung in CAM i cuh ding ah kum 35 a tling lomi cu a ngah lo timi chimfiannak ka tuah mi hi aa laak sual a si lai ti ka zumh. Cun, amah zong nih dantat ding tiangin report nak a ka tuahmi a si lo. Commission lei nih pakhat le pakhat kar ah i hmuh thiam lonak a um nakhnga lo remnak an kan serpiak mi hi a si,” tiah The Hakha Post ah a chim ve.
Pu San Thawm Thang zong hi tutan ah Chin National League For Democracy party in Sagaing Ramthen Chin Affairs Minister ah aa zuam ding a si ve tiah theih a si.
Cun, hi kong he pehtlai in Kalay Election Commission Zung Lutlai Pu Kin Khanh Pau nih, “An pahnih kong ah kanmah lei nih tuahpiaknak nawl kan ngei lo. An pahnih kar buainak a si ca ah i rem than ding in remnak kan tuahpiak hna hi a si. An pahnih kar ah remnak zong ser khawh a si cang,” tiah Zalen Media ah a chim.
Salai Lal Thang Cuang hi atu ah kum 34 lawng a si rih nain, 2021 kum Cozah thar rian an thlen hlan ah kum 35 a tlin lai ca ah upadi nih a onh bantuk in aa cuh ve hi a si.
