2020 kum Myanmar ram party tling democracy thimnak ah Sagaing Ramthen, Chin Affairs Minister ah nihin tiang zuam ding in min a pe mi minung 7 an si cang tiah thawng kan theih. Sagaing Ramthen Chin Affairs Minister ca ah Independent in minung 2 le ramkheel party in party panga an i zuam lai.
Independent in aa zuam ding Pu Bual Hnok nih, “Sagaing Ramthen Chin Affairs Minister ah i zuam ve ding in biachahnak ka ngei ve. A herhbau mi, timhlamh ding thil tete zong atu hi ka tawlrel cuahmah. Cun, tutan thimnak ah CAM ai cuh ding hi kan tam ngai, nihin tiang lawng hmanh ah minung 7 kan si cang. Min a pe ding zong Independent lei in minung pahnih thum cu an um rih tiah ka theih. Miphun an dawt ruang ah le an tlaihchan ruang ah atu bantuk in aa zuam ding kan tam hi kaa lawm tuk. Teinak tu hi cu Pathian nawl a si ko,” tiah The Hakha Post ah a chim.
CAM aa cuh ding mi hna hi Independent in Pu Bual Hnok le Salai Lal Than Cuang, NLD in Pi Lal Rin Muan, CNLD in Pu San Thawm Thang, UDP in Pu Mang Khaw Hung, USDP in Pu Thang Seia, UBP in Salai Lal Bawi Bik hna an si.
Cun, CNLD in aa zuam ding Pu San Thawm Thang nih, “Chin Party a si mi CNLD in i zuam ding ah party nih thim ka si. Miphun dawtnak le zawnruahnak taktak he i zuam ding in kaa tim. Cun, hi kaa zuamnak ah teinak zong ka hmu hrimhrim ko lai tiah zumhnak ka ngei. Zuamnak ah teinak ka hmuh a si ahcun ka miphun ca ah atu nakin rian tampi ka tuan khawh lai ti ruahchannak zong ka ngei,” tiah The Hakha Post ah a chim.
Chin Party theng te ah ka luhnak a ruang zong hi, kanmah Chin party lawng nih Chinmi kan herhbau mi thil a tuah khawh lai ti ka hmuh ca ah a si tiah Pu San Thawm Thang nih a chimchap.
