2020 kum November 8 i party tling democracy thimnak ah Sagaing Ramthen, Chin mizapi Palai Chin Affairs Minister ca ah Independent in Salai Lal Than Cuang aa zuam ve lai tiah thawng kan theih.
Sagaing Ramthen, Chin Mizapi Palai ca ah Chin Affairs Minister cuh kaa timh hi zeidang ah si loin Sagaing Ramthen chung ah a ummi Chinmi ka unau hna chawlehthalnak lei ah siseh, an khuasak tintuknak lei ah siseh atu nakin an thancho khawh nakhnga timi tinh in kaa zuam lai tiah Salai Lal Than Cuang nih a chim.
“Party thatha zong tampi a um ko bu ah zeiruang ahdah party ah luh loin keimah pumpak in zuam kaa timh mi hi mizapi nan khuaruah zong a har kho men. Minung tampi nih hihi an ka hal bik mi zong a si. Chinmi nih kan ruah sual tawn mi cu party loin ramkheel khawh a si lo ti hi a si. Kan Chinmi nih party loin ramkheel khawh tuk a si timi langhternak ah ti hi a pakhatnak ah ka duh mi a si. Cun, party hi an tam tuk tik ah pakhat le pakhat hi i hmuh thiam lonak, bia i elnak tete tampi a um. Cu a si ca ah party i ka luh a si ahcun i hmuh thiam lonak le bia i elnak ruang ah ka miphun le ka ram ca ah rian ka tuan manh sual lai lo ti ka phang,” tiah Salai Lal Than Cuang nih The Hakha Post ah a chim.
Cun, Pathian zaangfahnak le dawtnak in kaa cuh ve mi a tlamtling i ka va hmuh khawh sual a si ahcun mizapi nih bochan tlak mi, zohchunh tlak mi, kawh-auh tlak mi si ding hi a si khawh chung in kaa zuam ding mi a si tiah a chimchap.
Salai Lal Than Cuang hi Rev. Lal Piang Thang le Pi Khaw Lian Ruat hna i an fapa a si i, India ram ah Bible lei in sianginn a dih ve mi a si. Cun, Myanmar Council of Churches ah Lutlai pakhat zong a si. President Win Myint sin ah Christmas a va tuahpiak tu a si.
