Nizaan November 11 zaan ah SAC ralkap nih Mandalay ramṭhen, Mogok khua ah vanlawng in bomb a thlak caah tualchungmi 20 an nunnak a liam, tiah theih a si.
Ta’ang hriamtlai TNLA nih an laakmi Mogok khuachung i sang pathum cu zaan sml. 11:00 hrawng ah SAC nih vanlawng in bomb a thlak hi a si i, tualchungmi pa 16 le nu 4 an nunnak a liam.
Minung 20 an thih pin ah ngakchia pakhat tel in a dang tualchungmi 13 hliamhma an pu, tiah TNLA ṭuanvo ngeitu Lwe Ye Oo nih a chim.
Myanmar ramchung ah lungvar mansung tampi a chuahnak Mogok khua cu atu kum July thla ah khan TNLA le PDF nih SAC ralkap kut in an rak laakmi a si.
Ralzaam tampi Mogok khua ah an rak kir thluahmah lio ah SAC ralkap nih atu bantuk in vanlawng in bomb thlaknak a tuah tik ah khuami hna lungrethei le thinphang in an um hna, tiah theih a si.
