Shanram chaklei, Namkham khua le Pekon ralzaam camp cu SAC nih vanlawng in bomb a thlak caah ngakchia tete tel in tualchungmi 20 an thi, tiah theih a si.
Namkham khuachung, Bazar pawng i tualchungmi khuasaknak inn pawl cu SAC ralkap nih nihin September 6 zinglei sml. 1:35 ah fighter jet in Pound 500 bomb a thlak.
Cu vanlawng bomb thlaknak ah cun ngakchia pahnih tel in tualchungmi 11 an thi, tiah mi bawmtu zatlang bu tuanvo ngeitu pakhat nih a chim.
Nizaan September 5 zaan sml. 9:30 zong ah Shanram, Pekon khua i ralzaam camp cu SAC ralkap nih fighter jet in bomb a thlak i ngakchia panga tel in tualchungmi pakua an thi.
Tlangcungmi hriamtlai hna nih an laakmi khuapi le khuate vialte kan doh dih ṭhan lai tiah September 3 ah Min Aung Hlaing nih a chim hnu ah atu bantuk in SAC ralkap nih vanlawng bomb thlaknak an tuah hi a si.
