Chinram chung ah SAC pek mi tender rian a ṭuan mi hna nih rian ngol colh ding le, nawl a zul lo mi cu faakpi in dan kan tat cang hna lai tiah Chinland Cozah nih nihin June 11 ah ralrin peknak thawng a thanh.
“Chinland Cozah nih SAC cu ralhraang phu ah kan chiah cang mi hna an si caah, anmah rian a si mi poh ṭuan lo ding in Chinram Cozah nih faakpi in a doh,” tiah thawngthanhnak ah an ṭial.
Mizapi nawlngeihnak chuttu SAC nih an bu caan sau a dir khawh nakding ah tender rian pawl aa hmaithlak mi cu Chinland Cozah nih kan theih cia a si ti zong an langhter.
“Ralhraang council nih pek mi tender rian a ṭuan mi rianngeitu, bu asiloah minung hna nih rian ngol colh ding in ralrin kan in pek hna,” tiah an tial.
Hi kan khap mi a zul lo mi cu faakpi in dantat an si lai ti zong cathanh ah Chinland Cozah nih ralrinpeknak thawng a thanh.
