SAC nih cabuai cung ah remdaihnak biaruah ding in tlangcungmi hriamtlai hna le PDF a sawmmi hna kong ah CNF/CNA chimnak nawlngei Salai Htet Ni nih zeiti lei hmanh in kan cohlang lo, i ceihhmai awk a um lo tiah a chim.
Nihin November 5 zaanlei h NUG, CNF, KNU le KNPP nih online in hmun khat ah Press Conference an tuah i a cunglei bantuk in Salai Htet Ni nih a chim hi a si.
Salai Htet Ni nih, “Atulio a cangmi Myanmar ramkhel buaibainak hi ralkap nih uknak a laak caah a chuakmi a si tiah Min Aung Hlaing nih cun a chim. Cucaah, hriamnam chiah in ramkhel party ser i thimnak ah i tel ding in Min Aung Hlaing nih sawmnak a tuah. A tawinak in chim ahcun atulio Myanmar ramkhel buaibainak i a hrampi cu (SAC) ralkap miaknak le hlawknak lawng a kilvengtu 2008 Phunghrampi hi a si. Cucaah, biaruah ding in a kan sawmmi cu cohlan awk hrimhrim a ṭha lo i, dirhmun fek chinchin le ṭhawng chinchin in ral kan do lai,” tiah a chim.
2008 phunghrampi cu hrawh a si cang bantuk in SAC nih 2008 phunghrampi i cherhchan in a tuahmi thil kong ah zeihmanh ceihhmai awk kan ngei lo, tiah Salai Htet Ni nih a chim chap.
“Ramkhel rian ah ralkap i tel lo ding in le Federal Democracy phunghram thar suai ding in kan i zuam cuahmah. Cu Federal Democracy phunghram thar kan suai khawh nakhnga ralkap uknak a hram chah ding in kan doh cuahmah hi a si,” tiah Salai Htet Ni nih nihin Press Conference ah a chim.
