Hakha khua ah SAC ralkap le an hnuzul pawl nih ralkap tlakter ding min cazin hramhram in an laak rih caah CDF-Hakha nih kahdohnak pehtlai in a tuah tiah kan theih.
“March 19, zanlei sml. 6:30 ah Hakha khua, Ramkulh Cozah Zung inn cung ah a um mi 39 channels drone card zong kan hrawh,” tiah CDF-Hakha nih a thanh.
Cucu 2024 February 19 ah a rak phan thar mi drone card pahnih lak ah pakhat a si i Hakha khua phone line a chiatter dih tu a si… Hi hlan ah Hakha SAC nih an hman mi drone card hna cu 16 channels lawng an si, tiah theih a si.
March 20, zanlei sml. 3:20 ah, Paleklen Sianginn ah umhmun a khuar mi SAC ralkap le palek hna cu CDF-Hakha nih an va kah hna i pathum hma an pu tiah CDF-Hakha nih thawngthanhnak ah an tial.
“SAC ralkap tlak ding in min cazin laknak ah aa tel i, a tawlreltu SAC zung rianṭuan nan dihlak CDF-Hakha nih ralhraang ralkap bantuk in kan in hmuh hna… ralhraang bangin hma lak nan si lai,” tiah CDF-Hakha nih March 18 ah a rak thanh i kahdohnak zong a rak tuah.
Min cazin pehzul in an laak rih ko ahcun kahdohnak a zual khawh caah mizapi ralring tein um ding le, cu bantuk in hramhram in ralhrang ralkap tlak a duh lo i ram le miphun ca ah Pau dothlennak ah ka pum ka pe ve lai a ti mi paoh caah CDF-Hakha nih innka kaupi in kan hon ti zong thawngthanhnak ah an telhchih.
Photo: CDF-Hakha
