SAC ralkap tlakter ding min cazin laknak ah a tel mi SAC zung rianṭuantu dihlak ralrin pek le theihternak ca CDF-Hakha nih nihin, March 19 ah a chuah.
“SAC ralkap tlak ding in min cazin laknak ah aa tel i, a tawlreltu SAC zung rianṭuan nan dihlak CDF-Hakha nih ralhraang ralkap bantuk in kan in hmuh hna. Cucaah ralhraang bangin hma lak nan si lai,” tiah CDF-Hakha nih theihternak a tuah.
SAC nih hramhram in ralkap tlak nakding min cazin an laak caah Hakha khua ah 2024 March 18, zanlei sml. 2:00 in 5:15 tiang le March 19 ah kah dohnak kan tuah tiah an langhter.
Ruahlopi in kahdohnak a chuah peng khawh caah mizapi zong ralring tein um ding le ralhraang cawlcanghnak hna CDF-Hakha sin thawngthanh ding zong cathanh ah an langhter.
Nizan March 18 ah SAC hnuzul pawl nih Hakha khua chung sang cheukhat zapi inn ah lut in, ralkap tla ding in kumtling sinak catlap (Pungsan 2) le ralkap tla ding in kumtling a si ko ti mi hliahnak catlap (Pungsan 5) an pek hna i an phitter hna.
