Tedim peng, Kalay-Tedim le Kalay-Falam lampi tonnak ah a um mi Taingen khua cu SAC ralkap nih an khangh i, a ciam mi inn hna le a rawkral mi hmanthlak cu Taingen FB cahmai nih nihin June 27 ah a langhter.
Tedim khua lei in aa thawh mi SAC ralkap a za leng nih, PDF Zoland nih an rak laak mi Keneddy tlang cu June 18 ah an laak hnu ah Taingen lei ah an lan. Taingen le Keneddy tlang kar ah CDF CDM Siyin ralkap pawl nih voi tampi bomb an puah hna.
Cu SAC ralkap pawl cu June 21 ah Taingen khua an phan i, cu ni ṭhiamṭhiam ah cun Taingen khua inn cheukhat an duah. 2024 June 23 ah Taingen khua Biakinn le sianginn tel in inn 23 an khanghchap tiah CDF CDM Siyin thawngthanhnak in theih a si.
“SAC ralkap nih an duah mi inn le inn ngeitu min cazin cu felfai tein kan khawmh cuahmah i bawmhchanh khawh nakding ah kan i zuam lai,” tiah CDF CDM Siyin nih zapi sin theihternak a tuah.
Taingen khua a khaangtu SAC ralkap pawl cu Chinland Cozah ralkap nih chun zaan din lo in an doh hna caah June 26 ah an zaam. Lam a um lo nak ramlak in an zaam i June 27 ah Khaikam khua palek sakhan an phan. Chinland Cozah ralkap nih Khaikam khuapi pawng tiang an va dawi hna tiah theih a si.
