October 24, 2023
Matupi hrambunh SAC ralhraang Infantry Battalion – 140 in ralkap pawl nih Matupi Pengkomh Zung kiangkap inn pawl an boh, thil an fir hna hnu ah motor in battalion kulh chung ah an i kalpi tiah theih a si.
“Matupi khua, Pengkomh Zung ah SAC ralhraang pawl umhmun an khuar i a pawngkam inn pawl ni fatin an boh; inn saknak thilri le inn chung thilri pawl an fir lengmang ti in tualchung mi nih an chim” tiah Ayeyarwaddy Times nih a tial.
“Pengkomh Zung pawng inn kip an boh. Ram sining ruang ah inn cheukhat cu sak liopi ah an ngol hna. Mi cheu cu khuapi chung le khuate ah an i thial. Raal ruang ah an zaam. Sak lio mi inn le minung um lonak inn chung ah SAC ralkap pawl nih thingah le thir pawl motor in an rak laak dih hna i an battalion kulh chung ah an kalpi” tiah khuami pakhat nih Ayeyarwaddy Times ah a chim.
A luan cia May thla zarh hnihnak lio i Matupi peng ah a hraang mi Mocha thlichia ruang ah SAC camp chung inn cheukhat an rawk. Cu a rawk mi pawl remhnak ah Ngalai khua le Pengkomh Zung pawngkam ah SAC ralhraang pawl nih inn saknak thilri tampi an fir tiah theih a si.
A luan cia January 15 zong ah SAC ralhraang pawl nih Matupi peng, Ngailai khua cu an nam i, khuami inn dihlak an boh hnu ah Kyats sing 100 man ringlo an rak fir cang.
Hmanthlak: SAC ralhraang nih Ngalai khua ah an boh i thil an rak firnak inn cheukhat
