Mon ramkulh, Kyaikto peng ah SAC ralkap nih Journalist pahnih le PDF ralkap pahnih an thah hna, tiah theih a si.
Nizaan August 22 ah khan Kyaikto peng, Latt-piat khuate ah a ummi Journalist Ko Htet Myat Thu (kum 28) le Ko Win Htut Oo (kum 26) an umnak inn ah PDF an kal tiah dalan nih thawngpang an pek ruang ah SAC ralkap tampi nih an kal hnawh hna i atu bantuk in thah an ton hi a si.
Tualchungmi pakhat nih, “SAC ralkap 30 hrawng nih an fuh hna i, Ko Htet Myat Thu cu an inn hmailei kutka a hon lio ah an kah. Ko Win Htut Oo le a dang PDF pahnih zong inn hnulei kutka in an zuan lio ah an kah hna,” tiah a chim.
Ko Htet Myat Thu hi The Voice of Than Phyu Zayat timi thawngzamhnak ah rian a ṭuanmi a si i, SAC ralkap nih thong an rak thlak balmi zong a si. Thonginn in a chuah hnu ah thawnglatu rian a ṭuan ṭhanmi a si.
Ko Win Htut Oo zong hi DVB le The Nation Voice thawngzamhnak ah Freelence Journalist in rian a ṭuanmi a sim, tiah The Nation Voice Editor Ko Nay Aung nih RFA sin ah a chim.
