June 25 zinglei sml. 3:00 hrawng ah SAC ralkap nih Hakha khua, Hakhathar sang ah khuami inn 10 cu petrol an toih i an khangh hna tiah CDF-Hakha nih a thanh.
Hakhathar lam ruk tonnak ah a um mi SAC ralkap hna cu CNA le CDF phu komh nih June 24 zaan sml. 8:00 ah an kah hna. Kahdohnak cu suimilaam pakhat hrawng a rau i, deilei ah SAC ralkap nih inn an khangh hna tiah kan theih.
SAC ralkap nih inn 10 an khangh mi chung ah inn sarih cu khuami nih mei an phalh khawh hna i inn thum a ciam tiah kan theih.
“SAC ralkap nih Petrol an toih i an khangh hna, petrol toih mi puanchia an khangh mi zong in inn an cheh. Inn sarih cu khuami nih mei an phalh khawh. Inn thum a ciam,” tiah khuami pakhat nih a chim.
Cu kahdohnak ah cun SAC lei kah mi hriamngan ruang ah khuami pakhat hma a pu ti zong theih a si.
“Cu bantuk in rammi cung ah sual a tuahtu ralhraang council cu faakpi in kan doh i, rammi hna sungh zatlaknak cung ah tuanvo an laak ṭhan lai,” ti zong CDF-Hakha thawngthanhnak ca ah an langhter.
