Kalaymyo ah Baibal sianginn a kai mi Salai Steven Cin Lam Khai (kum 25) cu SAC ralkap nih an tlaih hnu ah an thah, tiah chungkhar he naihniam nih an chim.
Salai Steven cu February 12 ah Baibal sianginn a phak lo caah an kawl i, Kalaymyo General Hospital ah a ruak a phan tiah an thanh hna.
“February 10 le 11, nihnih chung Sianginn in lengchuahnak nawl (Out Pass) an pek. Asinain, February 12 ah sianginn ah a rak phan lo. Chungkhar an pehtlaih tik ah inn zong a um lo an ti i, kan kawl. Kan hmuh lo tikah sizung kan chawnh. Nihin zinglei ah an rak laak cang mi ruak pakhat a um tiah sizung nih a kan ti i, hmanthlak a kan hmuhsak tik ah amah cu a si ko,” tiah Baibal sianginn cachimtu pakhat nih Zalen ah a chim.
Salai Steven ruak hi SAC ralkap nih sizung in an rak laak i chungkhar theihternak um lo in mei in an rak khangh.
Salai Steven i a chungkhar le naihniam pawl zong a ruak hmanthlak tibantuk online ah tar lo ding in SAC ralkap nih an tlerhkhawnh hna.
SAC ralkap nih Salai Steven hi motorcycle accident a tong tiah chungkhar an chimh hna nain a ruak hmanthlak ah tukvelhnak ruang ah a duk mi hmaneh pawl an um len.
Salai Steven ruak an khanghnak i tlawmpal a taang mi vutcaam cu February 13 ah khan chungkhar nih an laak, tiah theih a si.
