Nihin February 27 zinglei sml.10:30 hrawng ah Kalaymyo, Bochoh lam ah SAC ralkap nih motor cung in meithal in an kah hna ruang ah tualchungmi pahnih an thi i pakhat hliam a pu, tiah kan theih.
Motorcycle datsi rawn aa tim mi tualchungmi pakhat cu Buda Lamthen ah meithal in kah a ton caah hmunril in a nunnak a liam.
Bochoh lamkam ah a dir mi pa pakhat zong SAC ralkap nih motor cung in meithal in an kah caah a nunnak a liam ve. Cun, a dang pakhat hi Sanmyo phungki sianginn pawng ah an kah ve i a phei ah hliamhma a pu.
Nizaan Fenruary 26 ah a cang mi Kalay University le a kiangkap kahdohnak lio zong ah khan kum 40 hrawng a si mi tualchungmi pa pakhat cu SAC ralkap nih meithal in an kah caah a nunnak a liam ve.
Kalay khuachung ah SAC ralkap pawl motor in i chokvak in meithal kah thlorh in an kah caah mipi lengchuah an tih cio i, nihin cu Kalay khuachung zong a king ngaingai, tiah tualchungmi hna nih an chim.
