Thla 3 dengmang a rau cang mi Falam khua laak kahdohnak caan chung ah SAC ralkap le palek 100 leng kan tlaih cang hna, tiah CNDF nih nihin January 31 ah theihternak a tuah.
An tlaih mi SAC ralkap pawl hi Falam ah a um mi SAC ralkap pawl bawmh ding in an thlah mi hna an si tiah an langhter chap.
CNDF chimnak nawlngei Salai Timmy nih, “Falam ah SAC nih ralkap thazaang a chap thar mi an um. Atu ah cun Kha-Lah-Yah (268) sakhaan lawng a taang cang. A dang cu kan laak dih cang. Kha-Lah-Yah (268) zong hi a ruah hlan ah laak ding in CB nih kan i zuam cuahmah,” tiah a chim.
2024 December thla donghlei ah khan SAC ralkap 100 hrawng cu Kalay in Falam lei ah an thlah hna i a cheu hrawng cu CB nih lampi ah an tlaih hna.
Tlaih a tong ve mi SAC ralkap pakhat nih, “Kalay in helicopter pahnih in voi 4 a kan chiah. Tlangcung kan phak bak in mahka hi Falam a si cang, ṭum uh a kan ti. Kei lebang cu pe 10 a sannak helicopter cung in an ka zuanter caah ka kee kaa hrawh colh,” tiah CNDF nih an tuah mi biahalnak ah a chim.
2024 November 9 in khan Falam khua laak kahdohnak an rak thawk i, SAC palek 43 zong CB nih an tlaih hna, tiah theih a si.
