SAC ralkap nih an kah mi hriampi cu Lasho khuachung ah a tlak caah pastor pakhat mual a liam, tiah theih a si.
Nizaan July 11 ah Lasho khua, sang No. 1, Myaungmyah lam ah SAC ralkap ni an kah mi hriampi a tlak caah Karen miphun pastor pakhat mual a liam, tiah Khit Thit Media nih a ṭial.
Lasho kiangkap ah a um mi SAC ralkap sakhaan pawl cu July thla thawk in MNDAA nih doh hram an thawk i, SAC ralkap nih khuachung lei ah miakpi kahthlorh in an kah lengmang caah tualchung mi 10 nak tlawm lo an thi cang.
Tualchungmi pakhat nih, “Nizaan in khat SAC ralkap nih hriampi kah thlorh in an kah cang. MNDAA lei zong nih an kah ve hna. Atu zong hriampi kah thawng a thang peng ko,” tiah nihin zing ah a chim.
Lasho khuavengtu SAC ralkap bu lak ah abiapi bik pakhat ah aa tel mi Kha Ma Ya (507) cu July 7 ah khan MNDAA nih an laak khawh.
MNDAA nih Kha Ma Ya (507) an laak hnu in Lasho khuachung ah a um mi SAC ralkap bu Norhteastern Command Center in hriampi an kah lengmang caah Lasho khuami 60% nih himnak kawl in khua an zaamtak cang, tiah theih a si.
