Tonzang peng chung in SAC ralkap an thian cang bang in Tonzang khuapi ah a ummi Tonzang Genereal Hospital zong an hon khawh cang lai, tiah thawng kan theih.
Tonzang sizungpi cu aralaimi September 2 ah kan hon cang lai, tiah CDF-Tonzang dirkamhtu bu nih nizaan August 27 ah theihternak a tuah.
CDF-Tonzang dirkamhtu bu nih, “Tonzang Council hruainak in le Chinland Cozah bawmhnak in Tonzang sizungpi cu September 2 ah kan hon khawh cang lai,” tiah a langhter.
Tonzang sizungpi cu sibawipi pakhat, nurse pali, naungeihtertu sayama pahnih le general worker pahnih in hon hmasa a si lai i, rianṭuantu tlamtling in laak chap zong kan i zuam lai, tiah an langhter chap.
Tonzang khua cu kan hnu May 21 ah Chinland cozah ralkap hna nih an rak laakmi a si i, CDF-Tonzang le CNA nih runvennak lei ṭuanvo an laak, tiah kan theih.
