Nihin October 18, zinglei ah Falam peng, Zawnglei khuami nu Biak Hnem cu Pine Camp ah umhmun a khuar mi SAC ralhraang pawl tunh mi bomb rap aa lamh sual ca ah a nunnak a liam tiah theih a si.
“Nu Biak Hnem cu a hawile pali he thingba kawl ding in ramlak ah an kal. Anih cu a hawile pali lak ah a lai ah a kal i bomb rap aa lamh sual mi a si. Bomb nih a puah ruang ah a ke pakhat a bul i a thi tam tuk a chuah caah a nunnak a liam mi a si,” tiah a thi mi a unau pakhat chim mi chirhchan in The Rihli Voice nih a tial.
Bomb rap aa lamh sual caan hi zing suimilaam 9:00 hrawng ah a cang mi a si. A hawile nih inn lei phone an chawnh hna i zinglei 10:00 hrawng ah a ruak an tlunpi tiah theih a si.
Pine Camp ah umhmun a khuar mi SAC ralhrang pawl nih ramlak ah siseh, an camp kiangkap ah siseh bomh rap tampi an tunh ca ah mizapi lei nih tlunkal i ralrin ding zong tualchung media a si mi The Rihli Voice nih a langhter.
Photo: The Rihli Voice
