Ralhraang Council raltuknak vanlawng pawl nih India-Myanmar ramri, Mizo ram chung ah bomb a thlak mi cu faakpi in kan doh i cu kong ah a ran khawh chung in hma kan lakpiak uh tiah Young Mizo Association, Tuipuiral Group nih January 12 ah India Cozah sin ah halnak ca a chuah.
India ram chung ah zeirel lo ngai in a luan cia thla hnih chung voi tampi an rak zuang i tu tan ah bomb an rak thlak. Hihi a lianngan mi India ram ca ah a faak ngai mi a si i lothlo hna, thetse a latu hna le India-Myanmar ramri ah a um mi hna cu thinphaang in a umter hna. Ni hnih chung bomb a thlak ca ah Lothlo tampi le kut in riantuantu tampi cu an rian an tuan ngam ti lo. India ram chung ah bomb a tlak ca ah ramri Tio tiva ah thetse a phor mi India motor pakhat zong a rawk. tiah an cathanh ah an tial.
January 10 le 11 ah ni hnih peh in SAC Ralhraang Council nih Myanmar-India ramri ah a um mi Camp Victoria cu vanlawng in a tuk. January 10 ah an thlak mi bomb lak ah a tlawm bik pakhat cu Mizoram, Farkawn ram chung ah a tla.
India vawlei le thli cung ah ramkip upadi a buar mi Myanmar Ralkap cu fakpi in kan doh i India ram chung ah vanlawng zuan siseh, bomb thlak siseh a tuah mi cung ah India Cozah nih a ran khawhchung in hma kan lakpiak uh tiah Young Mizo Association, Tuipuiral Group nih an langhter.
