Myanmar ram rialdip uktu ṭhing a simi U Than Shwe a fanu i a vapa Dr. Nay Soe Maung cu October 23 ah SAC ralkap nih an tlaih, tiah theih a si.
SAC nih an tlaihmi Dr. Nay Soe Maung hi U Than Shwe a tupa Nay Shwe Thwe Aung i a pa a si i, Colonel rank tiang Myanmar ralkap ah rian a rak ṭuan balmi a si ve.
Dr. Nay Soe Maung tlaih a tonmi kong he pehtlai in “Online ah mizapi buaibaiter ding in ca a ṭial…” tiah SAC nih October 24 ah ca an chuah.
NLD chan i Mandalay ramṭhen Chief Minster a rak ṭuanmi Dr. Zaw Myint Maung a nunnak a liammi kong he pehtlai in Dr. Nay Soe Maung nih Facebook ah ca a ṭialmi ruang ah an tlaih hi a si, tiah mi tampi nih an zumh.
Mandalay ramṭhen Chief Minster ṭhing Dr. Zaw Myint Maung hi SAC ralkap nih U-Bo Thonginn ah thong an thlakmi a si. October 6 ah khan SAC nih luatnak an pek i, a thaizing October 7 ah cancer zawtnak in a nunnak a liam.
Dr. Zaw Myint Maung a thihmi kong he pehtlai in Dr. Nay Soe Maung nih, “Mizapi caah a ṭha bik in khua a khaang zungzaltu na si…hnangam tein i din cang law saya. Hi hnu vawlei ah na sem ṭhan a si ahcun zalennak le dinfelnak a umnak ram ah le minung kha minung bantuk in a hmu khotu ram ah rak i sem ṭhan te law,” tiah a Facebook cahmai ah a ṭial.
U Than Shwe fanu i a va a simi Dr. Nay Soe Maung atu bantuk in tlaih a tonmi kong ah Min Aung Hlaing nih hin amah lawnglawng hi nawlngeitu bik le bawizik ka si timi hmuhsak a duh caah a si, tiah Myanmar ramkhel thlihran a ngiathlaitu pakhat nih RFA ah a chim.
“Min Aung Hlaing nih nawlngeitu bik le bawizik a sinak langhter a duh caah a si ko. Atu ah cun U Than Shwe tupa Nay Shwe Thwe Aung le Nay Win tupa Aye Nay Win te phu zong an holh ngam ti lo, daidup in an umnak a sau cang. Min Aung Hlaing nih a bawi ṭhutdan a cuh khotu ding poh cu a sam dih ko hna,” tiah a chim.
