Nihin November 22, Mindat khua ah kahdohnak pehtlai in a faak i SAC nih jet fighter in voi 20 leng kahdohnak a tuah, Y12 vanlawng in bomb 100 leng a thlak tiah theih a si.
“Raltuknak vanlawng in voi 20 leng a thlak. Bomb 60 leng a si. Voi khat thlak ah pound 150 bomb paruk, pound 500 bomb pahnih tibantuk a phir in a thlak. Cu hmanh ah Y12 nih a thlak mi hi voi 100 leng a si,” tiah Mindat Peng Mizapi Ukhruainak Bu in tuanvo ngeitu Salai Yaw Mang nih People’s Spring ah a chim.
Mindat peng tualchung thawng a ṭial lengmangtu Ha Ka Lay zong nih, Mindat khua ah SAC vang lawng hna nih pound 500, pound 250 bomb le 120MM bombthei pawl an thlak hnanak kong a langhter ve.
Chin Brotherhood nih Mindat le Falam khua ah a um mi SAC ralkap camp hna cu 2024 November 9 thawk in an nam hna. Chin Brotherhood nih bawmh kan hal hna caah hawikom bu cheukhat nih raal a kan dohpi tiah November 13 ah an rak thanh.
Photo: Hkl Mindat
