Kalay peng, Kokeko khua i ralzaam camp cu SAC ralkap nih nizaan January 31 ah vanlawng in bomb a thlak caah ngakchia tel in tualchungmi 9 an nunnak a liam, tiah theih a si.
Zaanlei sml. 5:30 hrawng ah SAC ralkap nih vanlawng in bomb thlaknak a tuah hi a si i, ralzaam ngakchia pakhat tel in tualchungmi 9 an thih pin ah a dang minung 30 hrawng hliamhma an pu.
Tualchungmi pakhat nih, “Zaanlei sml. 5:30 hrawng khan Kokeko ralzaam camp ah SAC nih bomb a thlak. Kalay he meng 15 hrawng a hlatnak hmun a um mi ralzaam camp a si. A pawng i Tinthar khua zong a thlak ve nain mithi an um lo. Kokeko ralzaam camp ah cun minung pakua an thi i, a cheu cu an ruak zong aa ṭhen dih,” tiah Chin World ah a chim.
Hliamhma a pu mi minung 30 lak ah a zualhma deuh mi micheukhat zong an um i, hi nak hin a thi mi an tam deuh kho, tiah an ruah.
Atu kum January 16 ah khan Tamu peng, Khampat khua zong ah SAC ralkap nih vanlawng in bomb a rak tlak i, ngakchia pakhat tel in minung pahnih an nunnak a liam, tiah theih a si.
