Chinram chung SAC kuttang ah zung rian a ṭuanmi Non-CDM pawl cu SAC nih caan hmaan in thlahlawh a pek khawh hna lonak thla hnih thla thum hrawng a si cang, tiah Hakha khua i Non-CDM pawl nih an chim.
Atu bantuk in SAC nih Non-CDM pawl thlahlawh an pek khawh hna lonak aruang cu Hakha khua i acozah bank Myanmar Economic Bank (MEB) ah tangka a um ti lo caah a si, tiah Non-CDM pawl nih an chim.
Hakha Non-CDM pakhat nih, “Myanmar Economic Bank (MEB) zong ah tangka a um ti lo. Zung rianṭuan pawl zong thlahlawh an pek khawh hna lonak thla 3 hrawng a si cang,” tiah a chim.
Non-CDM nu pakhat nih, “Bank (MEB) ah tangka a apmi hi acozah zung pawl lawng an si cang. Mizapi lei in bank ah tangka ap a um ti lo. Helicopter zong a rat ngam lo caah tangka an phur kho ti lo. Cucaahcun bank ah tangka a um ti lo,” tiah a chim ve.
Hakha Non-CDM lak ah thla thum tiang thlahlawh a hmu ti lomi an um bantuk in Tedim le Falam zong ah thla hnih in thla thum tiang thlahlawh a hmu ti lomi an um ve.
Atulio Chinram chung ah Hakha, Falam, Tedim, Mindat le Khaikam lawng ah SAC nih zung a hon khawh cang i, zung rianṭuan (Non-CDM) pawl i an thlahlawh cu Kalaymyo i Myanmar Economic Bank nih a rak kuat tawn hna, tiah kan theih.
