2023 April 27, zaanlei suimilaam 3:30 hrawng ah SAC ralhraang Jet vanlawng nih Thantlang peng, Vanzang tlang, Tlanglo khua bomb a thlak i sualnak ngei lo khuami pahnih nunnak a liam, pasarih nak tlawm lo hma an pu tiah thawng kan theih.
A nunnak a liam mi pahnih cu Sianginn riantuan Pi Ni Dim (Kum 56 hrawng, CDMer) le Pu Hram Ceu an si i ngakchia tel in minung pasarih nak tlawm lo hma an pu tiah kan theih.
“Khua lai bak ah bomb hi a thlak i inn a rawk mi zong a tam. Hma pu zong an tam i hi nak zong in a thi mi an karh kho.” tiah khuami pakhat nih THP ah a chim.
SAC ralhraang pawl cu Chinram hmun kip kahdohnak ah an fah ca ah sualnak ngei lo rammi hmui ah i sel in vanlawng kahdohnak a tuah cuahmah. Nizan April 26 Timit kahdohnak ah Chin ralkap nih an umnak bo an chuh hna pin ah an hriamnam zong an laak khawh hnu in atu bantuk in sualnak ngei lo khuami bomb a thlak hna hi a si.
SAC ralhraang nih naite ah Chinram chung Thantlang peng Khuafo khua, Falam peng Webulah khua le Mindat peng Panpa khuate hna ah bomb a thlak i sualnak ngei lo khuami 21 nunnak a liam, minung tampi hma an pu.
Hmanthlak: SAC ralhraang nih vanlawng in bomb a thlak mi Tlanglo khua
