SAC he cabuai cung biaruah khawhnak lam a um ti lo caah kan i kap cang lai, tiah Myanmar tlangcungmi hriamtlai bu ngan bik ah aa tel mi SSPP/SSA (Shan State Army) nih a chim.
Panglong hnatlaknak cu Myanmar ralkap nih kum caan saupi zei rel lo in a hlawt pin ah Democracy uknak ser ding in cabuai cung biaruahnak lam zong a um ti lo caah kan i kap cang lai, tiah SSPP/SSA kum 60 tlin camtuak (May 3) ah SSPP/SSA Chairman Lieutenant General Sit Khun Saing nih a chim.
“Lung awṭawm in um awk a ṭha ti lo. Kannih nih kan duh bik mi cu ram buainak hi ramkhel ningcang in chimphoih hi a si. Asinain, atu ah cu bantuk cun a si khawh nakding lam a um ti lo. Cucaah, kan i kap cang lai. Thaizing ah ral nih a kan phak lo nakhnga nihin ah ral kan thawh a herh,” taih Lt. Gen Sit Khun Saing nih a chim.
SSPP/SSA cu U Thein Sein chan 2012 ah Myanmar cozah he ramkulh level le ramkomh level kahdaih hnatlaknak a rak tuah mi Shan miphun hriamtlai phu a si.
