Kalay peng Nitlak Thlanglei ah a um mi Sadaw khua PCM Biakinn cu SAC ralkap nih drone in bomb an thlak caah a rawk tiah theih asi.
Biakinn drone in bomb an thlak caan hi April 8, zanlei sml. 5:00 fai ah a si i Biakinn cu faak ngai in a rawk.
“Ralhraang nih Biakinn hna vanlawng le drone in bomb an thlak tawn mi hi cu, kan biaknak an kan zomhtaih a si. Mi tampi thi hna seh tiah timh ciammam tein an tuah mi zong a si,” tiah min langhter lo mi Pastor pakhat nih a chim.
SAC ralkap pawl nih Kalay peng, Nitlak Thlanglei ah rallam sial in an nam hna caah rammi ralkap phu komh he April 7 zinglei ah an i kap i, Kalay khuachung SAC ralkap nih miakpi in an bawmh hna. SAC ralkap nih miakpi le mei alh bomb tampi an kah caah Sadaw le Sekan kar changvut lo acre 3 fai a kaang ti zong tualchung mi hna sin in theih a si.
