KNU Brigade 7 hmunram Nyaunglebin pengkomh, Shwegyin pengchung i a um mi SAC ralkap Battalion LIB-351 camp cu KNLA le a hawikom phu hna nih minute 10 chung ah an laak tiah KNU nih November 19 ah a thanh.
LIB-351 camp cu November 17 zing suimilaam 5:30 ah KNLA phu komh nih an kah i minute 10 chung ah an laak. Cu camp laknak ah SAC lei a thi mi zat theih fian a si lo nain hriamnam tampi kan laak tiah KNU nih a thanh.
Camp laknak ah SAC ralhraang hriamnam an laak mi hna cu 60 MM miakpi zun khat, 60 MM bomb thei 53, RPG-7 bomb thei 26, 79 bomb, MA bomb 13, MA zenthong 1,126, kut cheh bomb 20, M-14 bomb 9, biachimnak seh(MA3. MA 2008) pakhat, inverter pakhat, MA kuanbawm 4, CM.3024-z pakhat, kuankham luchin 9 an laak.
Camp an laak dih ah SAC nih vanlawng in voi ruk bomb a thlak caah khuami inn 3 a rawk tiah theih a si.
Photo: KNU
