Chinram kulh, Hakha khua Rungtlang hrambunh SAC ralhraang Battalion -266 in ralkap pakhat cu nihin 2023 July 17 ah Chinland Defense Force – Hakha sin ah meithal le kuanzen he CDM a rak tuah tiah kan theih.
“Hramhram in uknak a la mi SAC ralkap rianṭuannak ka duh lo, Mizapi dohthlennak (Pau Dohthlennak) ah ka tel ve lai” tiah meithal le kuanzen he CDM a rak tuah mi a si ti in CDF-Hakha nih tu zaan ah a thanh.
SAC ralkap pa nih meithal MA1 zun 1, Magazine pali le Meithal kuan 126 he CDF-Hakha sin ah CDM a rak tuah i, a min tu cu an langhter lo.
“Hi bantukin Chinland Defense Force-Hakha sinah CDM in dohthlennak a tuahmi cu lunglawm tein kan cohlan i phaisa sing 50 kan pek lengah a humhimnak hmun a phak tiang ṭuanvo kan lak.
SAC ralkap rianṭuannak doh in, mipi dohthlennak (Pau dohthlennak) ah CDM in tel a duh mi poh cu, Chinland Defense Force-Hakha sinah pehtlaih khawh peng kan si, a humhim nak nan phak tiang ṭuanvo kan i lak hna lai” ti zong thawngthanhnak ah an langhterchih.
