Ruahpi a pehpeh in a suur ca ah Hakha khua ralrin kan herh:Deputy Director hlun Pu Chum Hre

Myanmar rampum huap in ruahpi a pehpeh in a suur ca ah Hakha khua ralrin ngaingai kan herh, tiah Social Welfare, Relief and Resettlement Deputy Director hlun Pu Chum Hre nih June 11 ah a chim.

“2015 kum Tlangmincimh lio zong kha ruahpi faak tuk in a suur lem lo. A pehpeh in a suur ca tu ah vawlei a hlanh i kha tluk faak in puicimh zatlak kan tonnak kha a si. Atu zong hi ruahpi aa peh pah cang tik ah ralrin deuh cu kan herh hrimhrim. A ruang cu Hakha hrawng inn kan sak ning cu a foundation fek huaha loin a tung kan dirh top i khakha tih a nung taktak mi a si,” tiah a cunglei upa nih The Hakha Post ah a chim.
Pu Chum Hre nih Hakha khua ralrin a herh ning kong a chim mi ah, “Hakha i rian ka tuan lio zong ah ka chim lengmang. Ralrin peknak zong kan tuah lengmang. Tukum zong an tuah ding a si cang. Ralrin peknak, lutihor felfai tein zohfel, lutihor ah hmunthur hlonh bak lo ding, cun inn kan sak tik ah a foundation thuk deuh le fek deuh a tung dirh ding, tibantuk hi a herh tuk mi a si,” tiah a chimchap.
2015 kum July thla dih ah kokek tlangmincimh in Rungtlang a cim i, Hakha khuachung siseh, a kiangkap khuate tampi a hrawh, lam a cim i Hakhathar Sang ah inn tampi thial an si.