Ruahpi a peh in a suur nain Chinram lamsuul a him ko: Minister Pu Sui Thio

Myanmar rampum huap ah a pehpeh in ruahpi a suur ruang ah tilian siseh, lamsuul rawh siseh a cang nain Chinram lamsuul cu a him ko, tiah Lamsuul Minister Zung in June 14 ah kan theih.

“Tlang a cim, lam zong a rawk ko. Hakha-Kalay kar Taingen hrawng ah lam a cim lengmang i motor zong a kham lengmang hna. Asinain tank ngan mi ready in kan chiah ko ca ah thinphan ding zong a um lo. Lam a him ko ti khawh a si. Cun, Gangaw lam lei Ruavan hrawng zong ah lam a cim nain tank ngan mi ready in kan chiah fawn. Chim duh mi cu lam an rawk ko nain lam a him ko, ready in seh zong kan chiah peng ko,” tiah Lamsuul Minister Pu Sui Thio nih The Hakha Post ah a chim.
Tutan ruahpi a pehpeh in a suur mi nih Chinram Mindat le Matupi lam, Rezua in Matupi lam, Hakha-Surkhua-Aika-Calthawng lam zong tam ngai a hrawh nain tank ngan mi (sehci) nih rianrang in a zuanhnawh ca ah lamsuul a him ko, tiah kan theih.
“Tutan ruahpi hi a pehpeh in a suur. Chinram kan vawlei cu a dor i ruahpi a peh in a suur ahcun tihnung ngai cu a si. Khuatelei hoi ahcun lam a cim i motorcycle hmanh a kal kho lo. Asinain, tank ngan mi ready in kan chiah peng ko ca ah lam a pit ti a um lo, lamsuul a him ko,” tiah a cunglei Minister nih a chimchap.
Atulio a pehpeh in a suur mi ruahpi nih Hakha-Kalay lam le Gangaw lam zeimawzat a hrawh. Hakhathar khuachung, Matupi, Thantlang khua le hmun dangdang ah innlo a hrawh lawng si loin lamsuul hmun zeimawzat a hrawh nain thinphang a si lo, a him ko tiah Minister Pu Sui Thio sin in kan theih.