Rakhine ramkulh chung ah Rohingya miphun pawl a bubu in thahnawnnak an tonmi kong ah International Criminal Court (ICC) nih Rakhine hriamtlai AA zong hlathlai ding in Fortify Rights nih nihin August 27 ah ca a chuah.
Vawleicung nuhrin covo bu ngan pakhat a simi Fortify Rights nih “Bangladesh le Rakhine ramkulh ah a ummi Rohinyga pawl nih an tonmi temtuarnak kong he pehtlai in ICC cu hlathlainak nawl a ngeitu bu a si bantuk in atulio ah AA nih Rohingya pawl cung i a tuahmi nuhrin covo buarnak pawl zong hi a hlathlai chih awk a si,” tiah a langhter.
“August 5 le 6 ah Bangladesh lei ah zaam a timmi Rohingya nu le ngakchia tel in minung tampi cu drone le hriampi in kah an ton caah minung 100 hrawng an thi. Thil sining mit in a hmutu Rohingya pakhat nih August 6 ah AA ralkap pawl nih Rohinyga ralzaam tampi an thah hna,” tiah Fortify Rights nih a langhter chih.
Reuters thawngzamhnak zong nih, “August 5 ah Maungdaw in Bangladesh lei ah a zaammi Rohingya pawl cu AA nih hriampi le shock missile in an kah hna caah Nat Tiva kam ah Rohingya tampi an thi. Tipaam ruang ah a thimi he tel cun Augut 5 ah hin Rohingya 200 hrawng an thi kho,” tiah a langhter.
Vawleicung thawngzamhnak hna le nuhrin covo bu hna nih an chimmi hi a hmun taktak ah a cangmi he aa dang, tiah AA nih August 21 ah ca a chuah ve.
