Chin Ramkulh, Falam Pengkomh, Rihkhawdar khuapi ah 2021 January 17 thok in COVID-19 zawtnak runvennak ca ah stay at home tuah a si cang tiah Rihkhawdar khuapi No.1 sang khuabawi sin in thawng kan theih.
Rihkhawdar ahhin 2021 January 15 lawng ah COVID-19 zawtnak hmuh mi minung panga an si. Hi chung ah minung pathum hi Rihkhawdar sii-inn ah rian a tuan mi sii-inn-uk le nurse sayama pahnih hna an i tel tiah kan theih.
Stay At Home an tuahmi kong he pehtlai in No.1 sang khuabawi Pu Chanliana nih, “Rihkhawdar khuapi ah January 17 khan stay at home tuah hram kan thok. Zeitik tiang dah stay at home hi kan tuah lai ti kan chim kho rih lo. Asinain, a tlawm bik zarh khat cu a si te ko lai. Zawtnak hmuh mi minung hna he naihniam in a ummi an dihlak zong zawtnak kan chek hna. Zawtnak kan chek mi zong Tedim sii-inn ah kan kuat cang. Cun, mizapi lei zong nih a herh huaha lo ah leeng chuah lo ding le a herh bakmi a si ahcun mask i huh hnu lawng ah chuah ding in nawl zong kan chuah,” tiah The Hakha Post ah a chim.
Sii-inn ah rian a tuanmi hna chung in zawtnak an hmuhnak Rihkhawdar sii-inn zong 2021 January 17 in caan karlak chung an khaar i khuami hna ngandamnak lei zohkhenh ding ah Falam sii-innpi lei nih sii lei thiamsang minung panga an thlah hna.
Nihin tiang Rihkhawdar khuapi ah zawtnak ngei minung paruk an si cang. Hi chung ah minung pakhat cu damnak a hmuh cang ca ah sii-inn in an chuahter i atu hi minung panga zohkhenh lio an si tiah kan theih.
