Nihin January 17 zinglei sml. 10:00 hrawng ah India-Myanmar ramri, Chinram chung Rihkhawdar ah Assam Rifles ralbawi cheukhat an rak lut, tiah thawng kan theih.
Rihkhawdar khuami pakhat nih, “Zinglei sml. 10:00 hrawng khan Helicopter pahnih in Zokhawthar ah an phan i, Rihkhawdar ah an rak lut. Immigration Zung (Lah Wa Kah) pangpar dum tiang an kal. Aho he hmanh an i chawn hna lo. Cu dih cun ramri hlei lei ah an kal i hman an i thlak dih in an kir ṭhan. An zapi ah minung 10 hrawng an si lai. Ka ruah ning ah atu bantuk in an rat hi thilṭha a si lai lo dah,” tiah a chim.
CNF/A he naihniam minung pakhat nih, “Assam Rifles ralkap pawl Rihkhawdar an luh hlan ah khan ramri ah CNF/A ralbawi he tonnak an ngei i, luhnak nawl an pek hna hnu ah an rak luh mi a si. Rih tiang cu an kal lo. Khuamawi tiang lawng an lut,” tiah a chim.
CNA hruai mi Chin miphun ralkap phu komh nih Rihkhawdar an laak hnu ah India lei nawlngeitu pawl Rihkhawdar ah a voi khatnak bik an rak luh a si. Hi kong he pehtlai hin CNF/A le CDF-Hualngoram nih phungning in thawngpang an chuah mi belte a um rih lo.
India-Myanmar ramri ah a um mi Rihkhawdar khua cu a luancia November 13, 2023 ah khan CNA hruai mi Chin miphun ralkap hna nih an rak laak i, ramri hlei cung ah Chin miphun thantar zong an tar cang.
