Kum 4 renglo kan riantuannak tete ah kan tuanchuah mi a um ngai ko, cu lak ah naupawi le ngakchia tangka fang in kan bawmhchanh khawh mi hna hi kaa lunghmuih bik mi hna lak ah aa tel, tiah Chin Ramkulh Cozah Social Affairs Minister Pu Pau Lun Min Thang nih May 14 ah a chim.
“Kan ti khawhtawk in rian tampi kan tuan ko. Cu lak ah naupawi le ngakchia bawmhnak hi cu hlan ah a um bal rih lo mi a si i hihi thil hmete ah an ruah sual men hnga. A ngaingai cu Social Affairs Minister pakhat dirhmun in kaa lunghmuih tuk. LIFT bawmhnak in 2017 June in kan thok i kum 2 an kan bawmh. Chin Ramkulh chung in minung 33,918 kan bawmh hna. Hihi thla 2 dan ah voi khat in kan bawmh hna. Tangka fang in 5.3 billion a dih. Cun, Ramkomh Cozah bawmhnak in 2019 October in a voi khatnak ah minung 33,172 an si i tangka in nuai 1429 a si. A voi hnihnak hi minung 32,667 an si i tangka fang in nuai 1410 a si. Ramkomh Cozah bawmhnak tu hi cu thla 3 dan ah voi khat in bawmh an si. Hmailei zong ah hi bawmhnak hi a um peng rih ko lai,” tiah Minister Pu Pau Lun Min Thang nih The Hakha Post ah a chim.
Hi bawmhnak hi naupawi mi kha a pawi nicaan in fa a ngeih tiang bawmh a si. Ngakchia kha a chuah nithla in kum 2 a tlin tiang bawmh an si. Ni khat ah tangka Ks. 500 lengmang bawmh an si i thla khat ah Ks. 15,000 bawmh an si. Hihi thil hmete alo nain Chinram cu sifak santlailo kan tam ca ah an vitamin cawknak ah a thathnempi ngaingai hna, ti zong a a chim fawn
