Rakhine ramkulh, Rathedaung peng Nitlak Thlanglei Maungdaw-Ahngumaw motor lam ah a um mi Koetankauk ramri hngak SAC ralkap camp cu AA nih ni hnih chung an kah hnu February 9 zinglei ah an laak khawh tiah Chaklei Unau Thum Phu nih an thanh.
Cu camp cu nikum November thla ah AA nih an rak laak mi Donepaik camp le Sheinkarli ramri hnak SAC camp pawng ah a um mi a si.
A luancia February 5 le 6 ah Maungdaw peng Chaklei ah a um mi Taungpyu Letyar le Letwei ramri hngak palek battalion camp pahnih zong AA nih a rak laak cang hna.
Chaklei Unau Thum Phu ah aa tel mi AA nih Rakhine ram chung ah kahdohnak pehtlai in a tuah i SAC ralkap camp le ramri hngak palek camp pawl pehtlai in a laak hna caah SAC lei nih ke ralkap in siseh, van lei le ti ralkap in siseh lehrulnak a tuah cuahmah ve.
SAC lei nih Rathedaung peng, Maungdaw peng, Ramree peng le Kyaukphyu peng khuate pawl cu miakpi in a kah hna, mei in an khangh hna i khuami zong a tlaih peng hna tiah Unau Thum Phu nih an tial.
Maungdaw peng, Gyinchaung khuate pawng ah a um mi Gyinchaung ramri hnak SAC camp zong hriamnam an chiah duh lo caah kah hram kan thawk cang i, hriamnam a chia duh lo mi SAC ralkap camp poh cu kan kah hna lai ti zong thawngthanhnak ah an langhter.
Photo: AA Info Desk (February 4-6 ah Bangladesh ramri Taungpyu (Letwei-Letyar) SAC ramri hnak ralkap camp le ARA, RSO camp ah AA nih an rak laak mi hriamnam kuanzen le thilri an si.)
