Mee pek sawmnak ngeih pah in le mizapi thazang pek pah in NLD Chairman le rampi ruahnak petu Daw Aung San Suu Syi nih November 5 ah a tanglei bantuk in a chim.
“Myanmar ram thimnak commission hi 2020 thimnak he pehtlai in hmape a um nakhnga lo kan si khawh chung in kan i zuam i, palhnak va um aikun phunghram ning tein tawlrel a si ko lai” tiah, a chim.
A biachimnak ah a telh chapmi cu “Mizapi nih lungtho tein 2020 thimnak ding caah nan itel mi cung ah kan i lawmhnak a ngan hringhran. Cuti mizapi nan sin ah i lawmh ding kan ngeih hi i lunghmuih tuk awk thil zong a si. Tu bantuk in i lawmhpi awk mizapi kan ngeih hi kannih caah cun lungthin tha a damter tuk mi thil phun khat a si,” a ti.
NLD Chairman Daw Aung San Suu Kyi nih rampi thimnak ahhin lungtlin lonak tete um ko hmanh seh, harnak tete zong cu um ko hman seh, 2020 rampi thimnak nih a ngeihmi limhang a zorter hlei lai lo nak kong te hna telh in mee pek sawmnak biacahnak ah a chim.
Tuni biachimnak ah bianabia pakhat hmang in mizapi sin ah forhfialnak a ngeih mi cu “Hai kung pakhat cung ah Hai thei tampi an tlai. Cu lak ah pum 5,6 cu a thu le a rawk mi an i tel theo ko. Nain a rawk mi pum 5, 6 nihkhan Hai kung nih a ngeihmi limhaang khi a zorter kho lai lo. Hi Hai kung cu mizapi caah thei tha tampi a chuahpi khotu kung a si ko rih lai,” tiah a chim.
NLD party minung hna zong nih Election phunglam ning tein cawlcangh ding le riantuan ding ah forhfialnak zong a ngeihchih hna i, November 6, zaan suimilam 12 hnu incun mee pek sawmnak le party angki, lukhuh le thantar te hna i hruk-eih le i ken te hna ngol cang ding in ralrin peknak zong a ngeih chih hna.
Daw Aung San Suu Kyi nih a bia cu hitin a donghter; “Mizapi kan dihlak in kan hmailei cu kanmah kut te ah a um tihi philh hraam hlah usih. Kan tuanbia cu kanmah kut tein kan tial ti zong thei peng in philh hlah usih. Kan dihlak in dikfel tein kan co mi thantar thlir in a dik mi democracy a tlinnak hnga caah November 8 ah kan sining dihlak in le lungtho thanuam in mee pe cio ding in cah le sawm kan duh hna,” tiin a bia cu a donghter. (Ref: 7 Day News)
