Myanmar ram ah ngandamnak zung riantuan mi pawl le volunteer pawl cu COVID-19 raikham sii an chunh cang hna, cun Myanmar rampi ningin COVID raikham sii chunh khawh nakding caah hin raikham sii a kan petu ram pawl cungah a hngatchan mi a si tiah rampi ruahnak petu Daw Aung San Suu Kyi nih a chim.
“Kanmah lei nih COVID-19 raikham sii hi kan ngah khawh nakding caah hi raikham sii an kan petu hna ram cung ah tampi aa hngatchan mi a si. Kanmah lei in cun kan cawk mi zong a um, an kan hlu ding zong an um, cun a kan hlu mi zong an um ko nain an kan kuatu ding ram nih an kan kuat lawngah a ngah ve lai. Asinain duhsah tein thla khat hnu thla khat pehzulh tein kan tuah lai i mizapi sin ah chunh khawh ding in timhtuahnak zong kan ngei” tiah rampi ruahnak petu Daw Aung San Suu Kyi nih a chim.
Mizapi zong nih COVID-19 raikham sii chunhnak ah i tel cio kan herh tiah Daw Aung San Suu Kyi nih forhfialnak zong a tuah. COVID raikham sii chunhnak kan tuah hi kan ram a himnak caah kan tuah mi a si, cun mizapi kan ngandam i kan i nuamh lawngah kan ram zong a thangcho lai tiah a chim.
Mizapi chawlehthal nak ah harnak a um nakhnga lo i runvennak caah tiin tangka 2,600 billion zong kan hman, cun chawlehthalnak hi punghman tein a um khawhnak hnga a herh ahcun tangka hman mi zong hi kan chap rih lai tiah rampi ruahnak petu Daw Aung San Suu Kyi nih a chim.(Ref: VOA)
