Mizoram le Myanmar ramri pehtlaihnak hlei cu ramkulh cozah hnatlakpinak tel lo in Assam Rifles ralkap nih khar ti lo ding in Mizoram Chief Minister nih ralbawi sin ah a chim.
Mizoram Chief Minister Pu Lalduhawma le Assam Rifles Eastern Command hruaitu Lt. General RC Tiwari cu May 21 ah Pu Lalduhawma zungkhan ah biaruahnak an ngei i ramri kong he pehtlai in a chimh mi a si.
Assam Rifles nih India-Myanmar pehtlaihnak hlei cu ramkulh cozah le central cozah hnatlakpinak tel lo in naite ah a rak khar, cu bantuk cu hi hnu ah tuahti lo ding in Assam Rifles ralbawi sin ah a chim tiah All India Radio News nih a langhter.
Mizo miphun he aa pehtlai mi kongkau cu Assam Rifles nih ramkulh cozah he i ceihmai hnu lawng ah an tuah awk a sinak kong a chimh tiah theih a si.
Mizoram Chief Minister ruahnak pek mi cu Lt. General RC Tiwari zong nih lunglawm tein a cohlan i, Assam Rifles nih biapi ah kan chiah lai tiah bia a leh, ti zong an langter.
India ram thimnak a um caah ti in India-Myanmar pehtlaihnak Rih-Zokhawthar hlei cu 2024 April 17 in 19 tiang Assam Rifles nih an rak khar. Cucu India Central Cozah le Ramkulh Cozah nawlpeknak zei hmanh um lo in Assam Rifles ralkap nih anmah nawl in an khar mi a si i, Central Cozah nawlpeknak in April 25 ah an hon ṭhan tiah theih a si.
Photo: Mizoram Chief Minister Pu Lalduhawma le Assam Rifles Eastern Command hruaitu Lt. General RC Tiwari
