Chin Ramkulh Cozah nih Chinram peng kua chung COVID-19 i runvennak ca ah tiin Myanmar tangka sing 20 bawmhnak a pek lai tiah Minister Pu Pau Lun Min Thang sin kan theih.
“Chin Ramkulh i peng kua chung ah COVID-19 i runvennak ca ah tiin Ramkulh Cozah nih sing 20 cio pek ding in biachah nak kan ngei. Hi tangka hi Peng kip i cozah he pehtlai in runvennak committee a dir mi sin ah kan pek hna lai. Cun, hi tangka hi Ramkomh cozah nih COVID-19 ca ah 1Billion Budget an kan pek mi chung si loin kanmah Chin Ramkulh cozah tangka sing 1000 chung in kan pek mi hna a si,” tiah The Hakha Post ah a chim.
COVID-19 in kan i runven, kan i khamh khawh nakhnga ca ah tiin a peng in siseh, a khua in siseh, zatlang bu in siseh, mino lei in siseh Committee dir cio a si. 2020 April 1 tiang ah COVID-19 in Myanmar ram chung ah a thi mi minung 1, zawtnak hrik a ngei mi minung 15 an si cang tiah kan theih.
Cun, Ramkulh Ngandamnak Zung Lutlai Dr. Aung Ngwe San nih “Committee hi Cozah lei lawng si loin khuachung mino siseh, zatlang bu in siseh dir kho ulaw ti ka duh. A ruang cu kanmah Cozah lei nih cun khuachung ahhin kan i choklet tuk kho lo i, thil sining hi kan thei thlu kho lo. Committee nan dir tik zong ah Cozah he pehtlaihnak hi tuah kho zungzal uhlaw a tha. Kan i bawm cio hna lai, kan tuanti hna lai,” tiah a chimchap.
