Ramkomh Cozah nih hna Hakha Khuahlun vawlei a feh le feh lo an zoh fel ter hna August 21 ah kan theih.
Hi kong he pehtlaih in Naypyidaw in a ra mi Vawlei Zohfelnaklei Thiamsang (Department of Geological Survey and Mineral Exploration (D.G.S.E) Deputy Director General Dr. Myint Soe nih, “Hakha khuahlun sang hi zerhkhat hrawng kan zohfel cang. Ramkomh Cozah nih Hakha khuahlun sang hi 2015 lio ah vawlei a rak cim. Atu ah khuahlun sang hna nih hi vawlei ah hin um a ngah than cang maw?inn sak a ngah cang maw? Tiin Chin Ramkulh Cozah sin ah an hal. Chin Ramkulh Cozah nih Ramkomh Cozah sinah a hal i kanmah nih vawlei a cawl le cawl lo kan chek. Hakha khuacung ah khuahlun sang hi a bia pi in kan chiah,” tiah The Hakha Post ah a chim.
“Zarhkhat chung kan zohfelnak ah Hakha khuahlun vawlei hi cu a hmun zong a rawn i vawlei a cawl mi kan hmuh tuk lo caah tlakrawh inn kan zohfel. Vawlei a cawlnak hmun cheukhat cu a um ko. 2015 kum lio i vawleil le 2020 kum vawlei kan tahchunh hna lai. 2015 kum bantuk in tih a nung mi cu a um tuk ti lo. Inn sak a ngah cang le ngah cang lo tiang in cun kan chim ngam rih lo. Kan i ralrin tu a herh mi a si ko. Khuahlun sang hi cu a cung lei in vawlei a cim chap ding zong ah um ti lo. A tang lei zong a tolh chap ding a um lo. Vawlei a rual ko. Vawlei a cawl mi zong kan hmu tuk lo. Kanmah nih cun inn sak ngah cang tinak nawl kan ngei lo. Vawlei aa hnin le hnin lo a chek tu lawng kan si. Um than duh ahcun vawlei a cimh lo naknga lung rual le Cozah he i bawm in ser ah a tha,” tiah Dr. Myint Soe nih a chimchap.
Atu lio Hakha khuahlun sang ah inn chung khuakhar 170 leng hrawng khua an sa tiah kan theih.
